1 & 2 Petrus

Temme'i tanda mariri jiong ke madoangki' ssa'ding Sura'na Petrus.

Den penduan sura'na Petrus nakiringan sininna tomatappa' jio propinsi Asia Biccu'.

Ia to bungah sura' diuki' dikua anna samatappa'-tappa'na to sininna tombacai, to mperasai kamaparrisan sola kadipakario-rioan, nasaba' matappa'i lako Puang Isa Almaseh.
Napakainga'i Petrus sininna to tombacai tee sura' natuli parannu lako Kareba Kasalamatan. Nasaba' mangkami mate Puang Isa Almaseh natuo pole', na mangkada kumua la ratu pole'i. Iamo joo anna da'tan bang mangrannuan moi namaparri', sanga naissenni kumua ia joo kamaparrisan napakeri Puang Allataala la nanii ngkitai kumua matappa' tongan unarika lako Almaseh. Meta'da tooi Petrus, anna pangngukuii tonganni messipa' susi sipa'-Na Puang Isa Almaseh.

Ia tee sura' mangpenduanna Petrus nakiring anna issenni tomatappa' nnewa tomangngajahhi sala. Ia to tomatappa' la nturu' pangngajaran tongan jio mai Puang Allataala sola Puang Isa Almaseh. Ia to pangngajaran tongan napangpeissenanmo anak gurun-Na, to mangkamo ngkita sola ssa'ding Puang Isa mangngajahhi. Napangpangngajaran tomangngajahhi sala nakua, <<Te'damo nalaratu pole' to Puang Isa>>. Napamanassai Petrus kumua, iara namela' ratu to Puang Isa, nasaba' madoangngi Puang Allataala kumua kenna danggi' naden tau masolang moi mesa'. Madoangri anna sininna tau mengkatoba' ngasan jio mai dosana anna salama'.