Massapeo'

Den mesaq curita napucurita to tojolo, napasikannai tee disanga massapeoq, susi tee curitanna: Den mesaq muane pole jio mai Kalosi disanga Manai, iamo adeqna puang iarika tomangparenta jio Kalosi na tobarani too.
Den pissen wattu namale kebaine jio Dante Mararih mesaq kampong lan parentana Barakah deqna kampong Balla. Ia tonna puramo kawin torro jiomi Balla, dialami Pake jio Balla. Na ia joq wattu sirarii to to-Duri na to-Toraja. Nadateqmi Salubarani to-Toraja ratu rrarii to to-Duri, na la ditalomi tee to-Duri.
Ratui jaja mai Salubarani to tau mpauanni joo disanga Manai kua: ”La natalomikiq tee to-Toraja. Ia anna teqda tamale mbantukan manassa natalomikiq”. Nakuamo tee Manai, ”Pasirempun ngasanmi tuu tau la male mangrari jio tana lapangna Balla.” Apa ia joo wattu teqdapa nadisangai Balla, sanga iamora nadisanga Balla, tonna sirempunmo to tau jio nadiballaran ampah. Iamo joo ballaran battuananna lan bahasa Indonesia ”hamparkan”, ia toomo dipasiala sanga Balla sampena lako too.
Apa purami sirempun to tau jio Balla pada polemi to tau lako bolana mpasadia kanallo la napukanallo male mangrari. Ia tee disanga Manai, iamo ponggawana, pole todami lako bolana. Apa ratui lako bolana teqdapa namanasu nandena bainena, na masekaqmi la male tarapassa naangkaqi joo pannasunna bainena namale llentenni joo kurinna, natiballu ngasan joo nande. Ia tee bainena masiriq gajai anna palai dee kampongna Mararih.
Ia tee Manai male todami sola to tau mangrari req Toraja. Ia tonna mangrarimo sola Toraja, taloi to-Toraja nadiulaq ratu req kampongna. Apa ratui req, budami mbantui to-Toraja jaji patalo poleqmi. Na iamo joo wattu nadibuno Manai, naleqtoii totoraja to ulunna na ia to kalena nabawami tosolana jaja mai nalamunni jio disanga Tarunjung.
Susimi tee curitanna, sabaq sisarak lalanni bainena tonna allomo, jaji napoleii abalaq tonna male mangrari, anna mate jio Toraja.
Iamo tee massapeoq, napahan to to-Duri to teqdapa namadalan pahanna lan agama sallang, naciaq sipangbongianan ke denni la naola na teqda namesaq pangngujuan. Jaji ianna den tau sangbola na teqda namesaq pangngujuan, musti sisarakki ke bongii anggiq namesaq bola nanii mammaq, baqtuka sisullei male, mesaq male too allo, mesaq male masawa. Sabaq malajaqi napolei abalaq susi tonna male mangrari Manai, nasisarak lalan bainena, sanggenna mate Manai jio Toraja, nadileqtoi to ulunna. Sampe lako too allo, budapa to-Duri mpahanni teq massapeoq, apa ia to matandemo sikolana ma madalan toomo pahan agamana teqdamo nakatappaqii.