Pemali.
1. Pemali ke kumillak melambiq, kabuh allo, na tangnga bongi.
2. Pemali mbunoi meong. Den tau mpahangngi kumua, ia to meong solana pare jio Duri.
3. Pemali mbunoi karang-karang, laqbih-laqbih ke allo Jumaq.
1. Ia tee pemali dipasiumpuq pangngajaran lako anak. Iana den pea pangkillakan, natuli kumillak bang susi tee mangka dipau jao, biasa nakuan tomatuanna kumua, Danggiq mukumillak bang! Mukuaraka kumadoiq mate! Tuo unapaq mubatingngimoq. Ia to pahangna tojolo tonna anuq, nang nasanga tongan ia kumua, ia ke susi bangngi joo to pea, waqding tongan ia la mparatu abalaq lako kalena. Mbai moi too den unapa tau mpahangngi susi joo, apa teqdamira nabuda, nasabaq mangngagama ngasanmo to tau. Jaji ia tee pemali naanggaq susimira pangpangngajah tau lako anakkana, nasabaq naissenmo pea kumua mapaqdikkiq, ke biung (ke matei to tomatuantaq). Apa ia to tomatua mapahangmo jiona kasalamatanna situruq agamana, masussari mangtangngah, ke denni to kumillak bang lan bolana, napakalajaqi to anakkana kumua, matenaq ke kumillakko, jaji iamo nakua pemali kumillak.
2. Pemali mbunoi meong. Ia tee pemali waqding dipekkiriq kumua moi nateqda napemali, nang teqda too nakullei dibuno punalla to meong, sangngadinna ke kasalanni, susinna ke ngkandei manuk, llollonni bale baqtu ssolanganni apa-apa lan bola. Diissen kumua mesaq olok-olok manaran waqding dipeara, natulungkiq nnulaqi balao lan mai bola, danggiq nakandei to pakean. Den mesaq curita, mbai iamo napusabaq naden to pemali tangmbunoi meong.
Susi tee curitanna. Den adeq mesaq keluarga tonna anuq gaja sugih. Buda umanna, baraqbahna, tangdipaumo to ewanan laenna. Nnampui too meong sangngindo. Ia joo tosugih, gaja ngoa namasekkeq. Ia ke wattu kakumandean omi, siratuanmi to meongna mennilang jiong toq ajena, tangmangkadannamira kumua bennaq kinandemi. Jambaraka la naben kande, nanasemaqri natipakattiaq male sigaja bela. Ia bangmo adeq nagaukanni keallo-keallo, naarannai sidongkongan. Den namangnawa-nawa nakua, ”Ah, laqbiran ke palainaq." "Mbai naden unapa tau mpakamojaqnaq," "ke kusalaii tee tosugih macecceng." Narimpunmi dikkaq to anakkana, namakkelong nakua, "Ia matiq antalao, denna upaq antaampaq makkundai mananaq e (matiq tamalemo, maupaq akiq taampaq baine makananaq)." Malemi lingka-lingka, naaranni ratu lako mesaq bola tomakario-rio. Moi na mesaq tomakario-rio, apa masannang penawanna ntarimai, nasabaq nakua to pekkirisanna, ratui joo meong la mbawanni dalleq. Nang den ia tau masannang, ke ratui to meong jio bolana, laqbih-laqbih ke ratui nakianak jio bolana. Susimi tee, taqpa nagaraganmi ngenan jio bolana, napakandei namariqpih jio. Ia tonna bongimo namammaq ngasanmi to tau, pasaqdingmi tee ampu bola, nasabaq sigaresean bangmi to apa nasaqding, nasangari mbai nninohhi. Apa miqcokki tonna melambiq, nakitai, ”Wa!” Sijangngaranni, nasabaq sininna to loqbang jao bola sola to paqpak teqda apa lan, nanii ngasanmi pare. Naponno toomi pare to paqpak. Teqda na pare manda, apa moi ewanan laenna membuda toomi ratu lan bolana joo tomakario-rio. Ia to katuoanna joo tau taqpa memmasannang, nasabaq nang to makassing penawanna, iamo nasanga tau, polloh jao mai langiq to kasugiranna. Jaji ia joo meong liwaq dipakamojaq, nasanga tau dipangkambura dadik tongan. Ia to tonnissenmi tee curita jao Duri liwaq napakamojaq to meong. Mbai iamo napusabaq tee, naaranni den tee pemali. Apa ia ke dikitai lako simesaq-mesaq tondok, nang napakamojaq ia tau to meong.
3. Pemali mbunoi karang-karang. Ia to pemalinna mbunoi karang-karang, laqbih-laqbih ke allo Jumaqi, susi tee. Den adeq tonna anuq namangrari nabi Muhammaq situruq curitanna tau jio Duri, namebuni lan loqkoq, disanga loqkoq Hira. Sumpalingan bangmi to tonnewai, male nnangahhi, nateqda naampaqi, apa ia tee nabi nakita bang to tau male melako male jio mai nnangahhi, apa kammaq bangngi. Iamo joo karang-karang mebola jio babana joo loqkoq nanii membuni, naendungngi, nateqda naampaqi tau. Mbai iamo joo napusabaq napemalianni tau piraq jio Duri mbunoi karang-karang. Apa nang pembuda kusaqding, ke mangcuritai to tau jio tana Duri napau tee curita. Mbai nang den ia tau mpahangngi kumua nnampaqkiq pahala, ke teqda nadibunoi tee olok-olok, nasabaq mangkamo ntulung nabi. Susimi tee to baqtu pira-pira pemali.
